Өскеменде Денсаулық күні оқу-жаттығуы өтті. Іс-шараны қалалық денешынықтыру, спорт және туризм бөлімі ұйымдастырды. Жобаға облыс орталығындағы мектептерден 200 оқушы қатысты, деп хабарлайды F16.kz.
Төрт күн бойы 5–9-сынып оқушылары «Нұртау» тау-шаңғы базасына барып, тәжірибелі нұсқаушылардан тау шаңғы және сноуборд тебуді үйренді.
Қалалық білім бөлімінің денешынықтыру әдіскері Сырым Байсұлтановтың айтуынша, жоба өткен аптада басталған. Күн сайын базаға 50 бала келіп, жаттығады.
Жобаға барлығы 200 оқушы тіркелді. Балалар оқу-жаттығу сабақтарынан өтіп жатыр. Нұсқаушылар оларға шаңғымен жүру, әртүрлі қимыл жасау, көтерілу және түсу тәсілдерін үйретті, – деді ол.
Қатысушыларға заманауи спорт құрал-жабдықтары берілді, жайлы көлікпен тасымалдап, ыстық тамақ ұйымдастырылды. Қауіпсіздікке ерекше көңіл бөлінген: сабақтар қорғаныс торымен қоршалған арнайы тау-шаңғы базасында өтті. Бес баладан жасақталған әр топқа жеке нұсқаушы бекітілді. Сонымен қатар мектептердің денешынықтыру пәні мұғалімдері де болды.
«Нұртау» тау-шаңғы курортының директоры Айдар Мадияров мұндай әлеуметтік жобаларға әрдайым қолдау білдіретінін айтты.
Қалалық денешынықтыру, спорт және туризм бөлімімен бірлесіп 200 оқушыны қабылдап жатырмыз. Біз қажетті құрал-жабдықтарды жалға беруді, трассадағы қауіпсіздікті және медициналық пункттің жұмысын қамтамасыз етеміз, – деді ол.
Тау шаңғы мен сноубордтан бөлек, оқушылар тюбингпен сырғанақ тепті. Балалар қыстың қызығын көріп, спорт дағдыларын меңгерді.
Ұйымдастырушылардың айтуынша, жоба денсаулықты шынықтыруға ғана емес, спорт арқылы өскелең ұрпақты әлеуметтендіруге бағытталған. Бағдарламаға аз қамтылған отбасылардан шыққан балалар да қатысты.
Қалалық денешынықтыру, спорт және туризм бөлімінің бас маманы Әсел Қабденнің сөзінше, негізгі мақсат – қысқы спорт түрлерін әр балаға қолжетімді ету.
Денсаулық күні – бұл жай ғана шаңғы тебу емес. Бұл – мінезді шыңдау, тәртіпке үйрену және өмір бойы есте қалатын жарқын әсерге бөлену, – деді ол.
Жаттығудың соңғы күнінде ауа райы қатысушыларды сынаққа салды. Боран соғып, айналаны ақ түтек болды. Бірақ арада бірнеше сағат өткенде күн шайдай ашылып, оқушылар таза ауадағы тамаша демалысты жалғастырды.
