«AMANAT» партиясы Шығыс Қазақстан облыстық филиалы жанындағы өңірлік кеңес отырысында отбасы институтын нығайту және әлеуметтік қолдау шараларын жетілдіру мәселелері қаралды, деп хабарлайды F16.kz.
Жиында отбасындағы зорлық-зомбылықтың алдын алу және қиын өмірлік жағдайдағы азаматтарға көмек көрсету бағытындағы жұмыстарға ерекше назар аударылды. Осы орайда өңірлік кеңестің төрағасы Сания Аубакирова бұл бағыттағы жұмыстардың маңыздылығына тоқталды.
Біздің басты мақсатымыз – қиын жағдайға тап болған әрбір азаматқа дер кезінде қолдау көрсетіп, тұрмыстық зорлық-зомбылықтың алдын алу. Бұл бағыттағы түсіндіру және профилактикалық жұмыстар тұрақты түрде жүргізілуде, – деді ол.
Кеңес отырысында «Жанұя» орталығының қызметі, тұрмыстық зорлық-зомбылықтың алдын алу шараларының тиімділігі және әлеуметтік нысандарға жүргізілген мониторинг нәтижелері талқыланды.
Жиын қорытындысы бойынша көтерілген барлық мәселелер бақылауға алынып, тиісті ұсынымдар әзірленді. Кеңес алдағы уақытта да отбасы институтын нығайту мен әлеуметтік қорғау жүйесін жетілдіру бағытындағы жұмыстарды жалғастырады.
