Облыс орталығында Жамбыл Жабаевтың 180 жылдығына арналған «Жыл алыбы — Жамбыл» атты әдеби ревю өтеді, деп хабарлайды F16.kz.
8 мамыр күні Жамбыл Жабаев ескерткіші тұрғызылған саябақта қала жұртшылығы бас қосады.
Пушкин атындағы облыстық кітапхананың ұйымдастыруымен өтетін шарада ақынның өлеңдері оқылып, әндері шырқалады, қатысушылар мен көрермендерге арнап бірнеше тақырыптық алаң ұйымдастырылады.
Шараның негізгі бөлімі – «Айтыс алаңы». Мұнда жас ақындар сөз өнерінің құдіретін көрсетіп, суырыпсалмалық шеберліктерін ортаға салады. Сондай-ақ саябақ аумағында «Поэтикалық квест» ұйымдастырылады. Қатысушылар Жамбыл өлеңдерінің үзінділерін іздеп тауып, QR-кодтар арқылы толық мәтіндерді құрастырып, ақын шығармашылығын интерактивті форматта меңгереді, — делінген хабарламада.
«Поэзия шеруі» бөлімінде жастар мен өнер майталмандары ақынның ең таңдаулы туындыларын мәнерлеп оқиды. Батырлық пен елдікті жырлаған термелер мен патриоттық жырлар саябақ аспанын тербетеді.
Шара барысында әдеби көрме ұйымдастырылады. Жамбыл Жабаевтың шығармалары, зерттеу еңбектері, әдеби жинақтар және ақын мұрасына арналған ғылыми еңбектермен жақынырақ танысуға болады.
Әдеби ревю 8 мамыр күні сағат 11.00-де Жамбыл атындағы саябақта өтеді.
