Шығыс Қазақстан облысының делегациясы Ресейдің Алтай өлкесіне жұмыс сапарымен барды. Аймақ басшысы Нұрымбет Сақтағанов бастаған ресми делегация құрамында ШҚО мәслихатының төрағасы Денис Рыпаков, бірқатар басқарманың басшылары мен сала мамандары бар, деп хабарлайды F16.kz.
Сапар Барнаул қаласындағы инновациялық агроөнеркәсіп жабдықтарын өндіруші «Комплекс Агро» компаниясынан басталды. Аталған компания — ауыл шаруашылығы техникаларын шығаратын жетекші кәсіпорындардың бірі. Кәсіпорынның бас директоры Дмитрий Беляев алдымен өндіріс процесімен, даму жоспарларымен таныстырып, шығарылатын техника мен жабдық түрлерін кеңейту бағыттарын атап өтті.
Делегация компанияның өндірістік желісіндегі техникалармен танысты. Атап айтқанда, «Алтай диск 12001» егіс кешені, «Алтай-27» астық кептіргіші, ликвилайзер, культиватор мен агрегаттарды өндіру және құрастыру барысы, бөлшектер дайындалатын заманауи станоктар көрсетілді.
Бүгінде компания бес өндірістік алаңды дамытып келеді. 2025 жылы жалпы аумағы 11 мың шаршы метр болатын жаңа өндірістік цех іске қосылған. Сондай-ақ 1600-ден астам техника өндіріліп, соңғы бес жылда өндіріс көлемі екі есеге жуық ұлғайтылған.
