ШҚО әкімі Нұрымбет Сақтағанов Германия Федеративтік Республикасының Қазақстандағы Елшісі Моника Иверсенмен кездесті, деп хабарлайды F16.kz.
Тараптар екіжақты ынтымақтастықты талқылап, түрлі салада бірлесе жұмыс істеу жайында сөз қозғады.
Еліміздегі су ресурстарының 40 пайызы біздің өңірде шоғырланған. Облыс түрлі минералдарға бай, тамылжыған табиғатының арқасында туризм саласын дамытуға көңіл бөліп отырмыз. Германиямен жасыл энергетика, цифрландыру және білім саласында бірлесе жұмыс істеуге дайынбыз, — деді аймақ басшысы.
Германия Федеративтік Республикасының Қазақстандағы Елшісі өз сөзінде арадағы байланысты нығайта түсуге ниетті екендіктерін білдірді.
Неміс кәсіпкерлерін Шығыс Қазақстанға инвестиция құюға шақырамын. Сондай-ақ өлкеде неміс өнерпаздарының концертін өткізіп, мәдени байланысты арттыруды да ұсынамын, — деді ол.
Кездесу соңында Моника Иверсен Нұрымбет Сақтағановқа Германияның көрікті жерлері бейнеленген фотоальбомды, ал ШҚО әкімі Елшіге естелікке облыс туралы кәдесыйды тарту етті.
