Бүгін облыстық мәслихаттың кезектен тыс XXIII сессиясы өтті. Жиын барысында Шығыс Қазақстан облысының үш жылдық бюджеті қайта бекітіліп, бірқатар маңызды жобаларға қаржы бөлу мәселесі қарастырылды, деп хабарлайды F16.kz.
ШҚО әкімі Нұрымбет Сақтағанов өңірдің үш жылдық бюджетіне өзгеріс енгізуді ұсынды. Аймақ басшысының айтуынша, ұзақ мерзімді жоспарлау арқылы ірі жобаларды тиімді жүзеге асыруға болады.
Үш жылдық бюджет тұрақты қаржыландыру мен бюджет қаражатын бөлудің ашықтығын қамтамасыз етеді. Яғни, уақыт пен ресурстың тапшылығынан маңызды жобалар аяқсыз қалып қалмайды, — деп атап өтті облыс әкімі.
Cондай-ақ депутаттар бірақатар ауқымды жобаларға қаржы бөлу мәселесін қарастырды. Мәселен, электр энергиясы тапшылығы бар аудандардың инфрақұрылымын жақсартуға бағытталған ауқымды жоба қолға алынбақ.
Айта кетейік, қазіргі күні Зайсан, Тарбағатай, Үлкен Нарын, Катонқарағай, Күршім және Марқакөл аудандарында бұл мәселе өте өзекті болып отыр.
Аймақ басшысы аталған ауқымды жобаға Үкімет қолдау білдіріп отырғанын жеткізді.
Жоспар бойынша Предгорный УК-500 қосалқы стансасынан жаңа желі тартылып, аталған аудандарды қосымша қуат көзімен қамтамасыз етеді.
Жоба жүзеге асырылса халықтың тұрмыс сапасын жақсартуға ықпал етпек.
