Шығыс Қазақстан облысы Солтүстік-Шығыс Азия елдері өңірлік әкімшіліктері қауымдастығына (СШАЕӨӘҚ) мүше болуға өтінім берді. Бұл Қытай, Корея, Ресей, Жапония, Моңғолия және өзге де мемлекеттердің 100-ден астам өңірін біріктіретін халықаралық платформа, деп хабарлайды F16.kz.
Облыс әкімі Нұрымбет Сақтағановтың жеке бастамасымен қауымдастыққа ресми өтініш Қазақстанның Корея Республикасындағы Елшілігі арқылы СШАЕӨӘҚ хатшылығына жолданды. ШҚО-ның мүшелікке қабылдану мәселесі келер жылы Бурятия Республикасында өтетін қауымдастық отырысында қаралмақ.
Қазіргі таңда СШАЕӨӘҚ-ның корреспондент-мүшелері қатарында Хошимин (Вьетнам), Шу облысы (Қырғызстан) және Түркістан облысы (Қазақстан) бар.
Шығыс Қазақстан төртінші қатысушы өңір атануы мүмкін.
Қауымдастыққа мүшелік Шығыс Қазақстанға Солтүстік-Шығыс Азия елдерімен сауда, көлік, логистика және инвестиция салаларындағы байланысты күшейтуге мүмкіндік береді.
Бұл өңірдің халықаралық беделін арттыру мен экономикалық стратегиясын жүзеге асыру жолындағы маңызды қадам.
