Шығыс Қазақстан облысының әкімі Нұрымбет Сақтағанов Өскемендегі «Айтас МП» ЖШС ұжымымен кездесіп, кәсіпорында еңбек етіп жүрген әйелдер қауымын 8 наурыз — Халықаралық әйелдер күні мерекесімен құттықтады, деп хабарлайды F16.kz порталы облыс әкімінің баспасөз қызметіне сілтеме жасап.
2012 жылы ашылған кәсіпорын бүгінде өңірдегі ірі өндіріс орындарының бірінен саналады. Зауытта шұжықтың 80-нен астам түрі мен жартылай фабрикаттар шығарылады. Өндіріс өнімдері Қазақстанның ішкі нарығына тарайды және Еуразиялық экономикалық одақ елдеріне де экспортталады.
Кәсіпорында қазір 360 адам жұмыс істейді. Жылына 14 мың тоннаға дейін өнім өндіретін заманауи зауыт Қазақстандағы бройлер құс етін өндіру және қайта өңдеу бойынша біртұтас өндірістік кластердің құрамына кіреді.
Кездесу барысында облыс әкімі өндіріс саласындағы жетістіктерге еңбек ұжымының қосқан үлесін ерекше атап өтті.
Мұндай жоғары өндірістік көрсеткіштердің артында кәсіби мамандардың күнделікті еңбегі жатыр. Әсіресе, ұжым құрамындағы жауапкершілігімен, тиянақтылығымен және еңбекқорлығымен ерекшеленетін әйелдердің үлесі ерекше. Сіздерді келе жатқан жарқын мерекемен шын жүректен құттықтаймын! Үйлеріңізде әрдайым бейбітшілік, махаббат пен береке болсын, – деді Нұрымбет Сақтағанов.
Сондай-ақ кездесу барысында аймақ басшысы еңбек ұжымымен бірге жаңа Конституция жобасын талқылап, пікір алмасты.
