Шығыс Қазақстан облысы азық-түлік өнімдерінің кейбір түрін өндіру көлемі жағынан республикада көш бастап тұр, деп хабарлайды F16.kz.
Ауыл шаруашылығы басқармасының мәліметінше, облыс өсімдік майы, жаңа ауланған балық, қымыз және бал өндіруде ел аймақтарының ішінде бірінші орынға шықты.
Сонымен қатар облыс басқа да маңызды өнім түрлері бойынша жоғары көрсеткіштерге қол жеткізген. Қарақұмық өндірісінде Павлодар облысынан кейін екінші орында, балқытылған ірімшік өндіруде Қостанай облысынан кейінгі, құрт өндіруде Түркістан облысынан кейінгі екінші орынды сақтап келеді, – деді басқарма басшысы Ажар Каджибекова.
Өңірдің агроөнеркәсіп әлеуеті құс еті, шұжық және консерві өнімдерін өндіруде де айқын көрінеді. Бұл бағыттарда Шығыс Қазақстан облысы үшінші сатыда орналасқан.
Былтыр облыста 285,1 млрд теңгеге тамақ өнімдері өндірілді, бұл ретте нақты көлем индексі 109,9% деңгейіне жетті. Оның ішінде ет жартылай фабрикаттары – 23,4%, жарма – 55,5%, балық және балық өнімдері – 32,9%, ұн – 15,7%, өсімдік майы – 9,6%, сары май – 19,6%, ірімшік пен сүзбе – 13,6%, торттар мен ұннан жасалған кондитерлік өнімдер 8,7% өскен.
