Бүгін Бозанбайда «Шығыс Салбурыны-2025» V халықаралық бүркітшілер фестивалінің екінші күні басталды. Әлемнің бірнеше елінен және Қазақстанның түкпір—түкпірінен келген құсбегілер Қалбаның атырабын дүбірге бөлеп, думанды тойдың көрігін қыздыра түсті, деп хабарлайды F16.kz.
Саятшылар бәсекесіне арнайы келген құрметті қонақтың бірі, белгілі жазушы, ақын Жәди Шәкенұлы Шығыста өтіп жатқан бүркітшілер тойын алғаш рет тамашалап отырғанын жеткізді.
Ұлан ауданының Бозанбай ауылында өтіп жатқан “Шығыс Салбурыны” мерекесіне бірінші рет келдім. Жалпы, сырттай хабардармын. Қасиетті мекен, қасиетті жер – ұлы Алтай тауының бөктерінде өтіп жатқан қазақтың ескі салт-дәстүріне қатысты осы бір мереке ұрпақтан-ұрпаққа жалғасын тапса ол ұлттық өзегімізді, рухани күшімізді, бабалардың бізге қалдырған асыл мұрасын кейінгі ұрпаққа жалғауға алтын әліппенің парақтары болатыны шүбәсіз. Сондықтан бұл ұлттық құндылықтарды ұлықтаған тойымыз тойға ұласа берсін, құтты болсын! – деп ақын жүрек ағынан жарылды.
Бағзыдан жеткен баба дәстүрді дәріптеп, ұлтымыздың асыл мұрасын насихаттаған мерейтойлық фестивальдің бағдарламасына сәйкес бүгін қатысушылар бүркітті шырғаға салу, қаршыға, ителгіні қолға шақыру сайыстарында өнер көрсетеді. Бұған дейін жазғанымыздай, Бүркіт төбедегі айтулы аламанда құсбегілер жүзден астам бүркіт, қаршыға, ителгі қатарлы қыран құстарды сынға салып жатыр.
Сонымен қатар халықаралық фестиваль аясында тақымы тастай жігіттер асау үйретіп, мергендер садақ атып сайысады. Үш күнге созылатын дүбірлі доданың финалы ертең, 11 қазанда өтеді.
