Шығыс Қазақстан облысының өкілдері агроөнеркәсіптік кешен, ауыл шаруашылығы және мал шаруашылығы салаларындағы тәжірибе алмасу мақсатында Ақмола облысына жұмыс сапарымен барды, деп хабарлайды F16.kz.
Делегация құрамында Катонқарағай, Шемонаиха және өзге де аудандардың әкімдері, экономика, ауыл шаруашылығы басқармаларының және салалық ведомстволардың өкілдері болды. Сапардың мақсаты — агробизнесті жүргізудегі озық тәжірибелермен танысу, мал шаруашылығын дамыту және ауылдарда жүзеге асырылып жатқан инвестициялық жобаларды зерделеу.
Айта кетейік, бұған дейін өңіраралық өзара іс-қимылдың осындай форматы Ұлытау облысымен жүзеге асырылған болатын. Бұл тәжірибе үздік тәжірибелермен алмасу және оларды енгізу тұрғысынан өзінің тиімділігін көрсетті.
10-11 маусым күндері Шығыс Қазақстаннан барған делегация Ақмола облысындағы алдыңғы қатарлы ауыл шаруашылығы кәсіпорындарын аралады. Атап айтқанда, Целиноград ауданындағы «Родина» ЖШС-нің сүт-тауарлы фермасы мен қайта өңдеу кешені, Сандықтау ауданындағы «Свободное» ЖШС, Ерейментау бордақылау алаңы, ауыл шаруашылығы өндірістік кооперативтері, Атбасар ауданындағы заманауи сүт-тауарлы фермалар және басқа да агроөнеркәсіптік кешен нысандары көрсетілді.
Қатысушылар өндірістік процесті ұйымдастыру, мал шаруашылығындағы заманауи технологиялар, мал азығын дайындау жүйесі және ауыл шаруашылығы өнімдерін қайта өңдеу бағыттарымен танысты.
Кездесулерге Ақмола облысы тарапынан аудан және ауылдық округ әкімдері, ауыл шаруашылығы құрылымдары мен фермерлік шаруашылықтардың басшылары қатысты.
Мәселен, 2024 жылдан бастап Сандықтау ауданында майлы дақылдардың егіс алқаптары белсенді түрде ұлғайтылып келеді. Мұнда күнбағыс, рапс және зығыр өсіріледі. Сондай-ақ жасымық пен басқа да бұршақ тұқымдас дақылдардың егіс көлемі артып отыр. Өткен жылы фермер Александр Закусиловтың шаруашылығында гектарынан 65 центнерге дейін өнім алынған.
Александр Александрович отбасы мүшелерімен бірге әкесінің ісін жалғастырып келеді. Ол ауыл шаруашылығын дамытуға ғана емес, Максимовка ауылы тұрғындарын әлеуметтік қолдауға да ерекше көңіл бөледі. Шаруашылық қаражаты есебінен мұнда 20 пәтерден тұратын тұтас бір көше салынып, кәсіпорын қызметкерлері сол баспаналарда тегін тұрып жатыр. Бұдан бөлек, ауылда сегіз жеке тұрғын үй және жас отбасыларға арналған көппәтерлі үй бой көтерген. Бүгінде Александр Закусиловтың екі кәсіпорнында 300 адам еңбек етеді.
Қонақтарға «Свободное» және «Максимовское» ЖШС басшысының қаражатына салынған «Арена» хоккей корты да таныстырылды.
Мұнда әртүрлі жастағы балалар коньки теуіп, спорттық жаттығуларды тегін жасай алады. Мұндай мүмкіндіктер бұқаралық спортты дамытуға және жастар арасында салауатты өмір салтын қалыптастыруға ықпал етеді деп есептеймін, — деді фермер.
Шығыс Қазақстан облысының делегациясы мұндай өңіраралық ынтымақтастықтың агроөнеркәсіптік кешенді дамыту, өндіріс тиімділігін арттыру және қазақстандық ауыл шаруашылығы тауарын өндірушілер арасында озық тәжірибені кеңінен тарату үшін маңыздылығын атап өтті.
