Облыс орталығында салынып жатқан гематология орталығының құрлысы биыл аяқталады. Бұл туралы аймақ басшысы Нұрымбет Сақтағанов облыстық мәслихаттың кезекті XX сессиясында мәлім етті, деп хабарлайды F16.kz тілшісі.
Биыл өңірде бірқатар медициналық жобаны іске асырып, үш нысанның құрлысын аяқтау жоспарланған.
Өскемендегі гематология орталығының, Риддер қаласындағы 500 адамға арналған аурухананың және Ұлан ауданындағы 150 адамдық емхананың құрылысы биыл аяқталады, — деді облыс әкімі.
Естеріңізге сала кетейік, гематология орталығының құрлысы 2022 жылы басталған. Қазір нысанның шатыры, қасбеті, терезе блоктары дайындалып, сыртқы инженерлік желілері тартылған, ал ішкі әрлеу жұмыстары аяқталуға жақын.
Өңір басшысы былтыр атқарылған бірнеше жобаға тоқталды.
«Ауылдық денсаулық сақтауды жаңғырту» ұлттық жобасы аясында 18 нысан салынып, алты жобаға жөндеу жүргізілді. Сондай-ақ шетелге біліктілігін арттыруға 44 медицина маманы жіберіліп, 456 медициналық құрылғы сатып алынды, — деп атап өтті Нұрымбет Сақтағанов.
Фото: primeminister.kz
