Өскеменде 8 наурыз – Халықаралық әйелдер күніне орай ерекше мерекелік акция басталды. «Сүйіктіме гүл” деп аталған игі бастама аясында қала жастары бұрымдыларға қуаныш сыйлауды мақсат етті, деп хабарлайды F16.kz.
Акция барысында гүлге толы автокөлік кортежі қала көшелерін аралап, сан салада еңбек етіп жүрген асыл жандарға қызғалдақ гүлін таратып бастады. Ұйымдастырушылардың айтуынша, қала бойынша мыңнан астам гүл шоғы үлестірілмек. Мерекелік гүлдер көшедегі адамдарға ғана емес, сонымен қатар аурухана қызметкерлеріне, сауда үйлеріндегі қыз-келіншектерге және мектептегі ұстаздарға да табысталып жатыр. Бұл сұлуларға күтпеген сый болғаны рас.
“Сүйіктіме гүл” акциясы – әйелдерге деген құрмет пен алғыстың жарқын көрінісі. Ұйымдастырушылар мұндай игі бастама арқылы көктемнің алғашқы мерекесінде сырғалыларға қуаныш сыйлауды көздеген.
8 наурыз – Халықаралық әйелдер күні әлемнің көптеген елінде тойланады. Бұл күні аналарға, әпке-қарындастарға, ұстаздар мен әріптестерге құрмет көрсетіліп, ақжарма тілек айтылады.
