ҚР Парламенті Мәжілісінің депутаты, «AMANAT» партиясы фракциясының мүшесі, Жалпыұлттық коалицияның мүшесі Ерлан Саиров Тарбағатай ауданының тұрғындарымен кездесті. Жиын барысында ел дамуы жолында айрықша маңызға ие Конституцияның жаңа жобасын кеңінен талқыланды, деп хабарлайды F16.kz.
Шара барысында Ерлан Бияхметұлы Конституцияның жаңа жобасында көзделген негізгі өзгерістерге, оның қоғам өміріндегі рөлі мен мемлекет дамуына ықпалына жан-жақты тоқталды. Атап айтқанда, азаматтардың құқықтары мен бостандықтарын кеңейту, билік тармақтары арасындағы тепе-теңдікті нығайту, қоғамдық бақылауды күшейту секілді өзекті бағыттар кеңінен түсіндірілді.
Жаңа Конституция – бұл жай ғана құқықтық құжат емес, еліміздің алдағы даму бағытын айқындайтын стратегиялық негіз. Біз күшті әрі әділетті Қазақстан құруды мақсат етеміз. Ол үшін заң үстемдігі, азаматтардың құқықтарының қорғалуы және биліктің ашықтығы қамтамасыз етілуге тиіс. Әрбір азаматтың пікірі маңызды. Сондықтан референдум – халықтың өз тағдырын өзі айқындайтын тарихи мүмкіндігі, – деді Ерлан Саиров.
Сонымен қатар, 15 наурыз күні өтетін жалпыұлттық референдумның маңыздылығы айтылып, депутат әрбір азаматты ел болашағына бейжай қарамай, саяси науқанға белсене қатысуға шақырды.
