ШҚО әкімінің бірінші орынбасары Жақсылық Омар «Алтай Альпісі» және «Нұртау» тау-шаңғы кешендерінің иесімен кездесіп, қауіпсіздік және туристерді қабылдауға дайындық мәселелерін талқылады, деп хабарлайды F16.kz.
Өңір тұрғындары қар түсе сала қысқы туристік маусымның ашылуын асыға күтеді. Бұған дейін, «Алтай Альпісі» демалыс базасы 15 қарашадан бастап жұмыс істейтінін жазғанбыз.
«Алтай Альпісі» тау-шаңғы кешеніндегі арқан жолдар мен инженерлік жүйелерге қажетті тексеру жұмыстары жүргізілді. Келесі жылдың басында жаңа қосалқы станцияның жобалық-сметалық құжаттамасы дайындалады. Бұл құрылыс туристік нысандарды және жақын маңдағы ауылдарды тұрақты электрмен қамтамасыз етіп, өңірдің туристік инфрақұрылымын кеңейтуге мүмкіндік береді, – дейді Жақсылық Омар.
Сондай-ақ демалыс орындарындағы автотұрақ орындарының санын арттыру мәселесі де талқыланды. Қыста мұнда өңір тұрғындарынан бөлек, туристер жиі келеді. Сондықтан көлік иелері мен қонақтарға ыңғайлы жағдай жасау өте маңызды.
Одан бөлек, демалыс орнында медициналық пункт пен кезекші мамандардың болуына да ерекше мән беру керек, – дейді облыс әкімінің бірінші орынбасары.
Қазіргі күні «Нұртау» тау-шаңғы кешеніне толық техникалық тексеру жүргізіліп жатыр. Жұмыстар аяқталғаннан кейін ғана база жұмыс істей бастайды.
