Қазір елімізде аспаз, тігінші, бухгалтер-кассир, шаштараз, тракторшы-машинист, маникюр шебері қатарлы мамандықтарға сұраныс жоғары, деп хабарлайды F16.kz.
Еңбек және халықты әлеуметтік қорғау министрлігі баспасөз қызметінің мәліметінше, биылғы 1 сәуірде Қазақстанда біліктілікті арттыру және жаңа мамандықтарды игеру мақсатында 22 051 адам кәсіптік оқу оқыған.
Айта кету керек, қысқа мерзімді оқыту бағдарламалары жұмыссыз азаматтарға бірнеше айда еңбек нарығында сұранысқа ие кәсіби дағдыларды меңгеруге мүмкіндік береді. Оқыту оқу ұйымдарында, жұмыс берушілердің жұмыс орындарында және онлайн форматта – Skills Enbek порталы арқылы жүргізіледі. Курс ұзақтығы 6 айдан аспайды және таңдалған мамандықтың ерекшелігіне байланысты белгіленеді.
Жұмыс берушілер базасында ұйымдастырылатын оқыту барысында қатысушыларға тәлімгер бекітіліп, еңбек шарты жасалады. Бұл кезеңде 20 айлық есептік көрсеткіш көлемінде жалақы төленеді. Жыл басынан бері мұндай форматта 288 адам білім алған.
Ал Skills Enbek платформасы арқылы онлайн оқумен 21,6 мың жұмыссыз қамтылды.
Ең сұранысқа ие мамандықтар қатарында аспаз (78 адам), тігінші (50), бухгалтер-кассир (28), шаштараз (26), тракторшы-машинист (25), маникюр шебері (24) және шаштараз-стилист (22) бар.
Қысқа мерзімді оқуға қатысу үшін азаматтар тұрғылықты жері бойынша Мансап орталықтарына, ал ауылдық елді мекендерде жергілікті әкімдіктерге жүгінуі қажет.
Бағдарлама аясында қатысушыларға оқу ақысы төленіп, шәкіртақы немесе жалақы беріледі, жол шығындары өтеледі. Сонымен қатар өзге өңірде білім алған жағдайда тұрғын үй жалдау шығындары да мемлекет есебінен өтеледі.
