Астана өтіп жатқан саммитте Қазақстан Президенті Қасым-Жомарт Тоқаев халықаралық құқықтың маңызы мен қазіргі жаһандық жағдайға қатысты пікір білдірді. Мемлекет басшысы әлемдегі тұрақсыздықтың күшеюі халықаралық институттардың рөліне жаңа талаптар қойып отырғанын атап өтті, деп хабарлайды F16.kz порталы Ақорданың баспасөз қызметі сілтеме жасап.
Президенттің айтуынша, қазіргі кезең – беталысы беймәлім, аумалы-төкпелі уақыт. Бұл жағдай өңірлік және жаһандық тұрақтылыққа елеулі әсер етіп, миллиондаған адамның тұрмыс сапасына кері ықпалын тигізіп отыр.
Соның салдарынан даму жолындағы күш-жігер, күрмеуі қиын экологиялық проблемаларға жұмсалуға тиіс ресурстар зая кетіп жатыр, – деді Қасым-Жомарт Тоқаев.
Мемлекет басшысы мұндай жағдайда халықаралық қоғамдастықтың рөлі ерекше екенін атап өтті. Оның сөзінше, 80 жыл бұрын құрылған Біріккен Ұлттар Ұйымы әлі күнге дейін баламасы жоқ әмбебап диалог алаңы болып отыр. Алайда осы уақыт ішінде әлем түбегейлі өзгерген.
Президент жасанды интеллектінің қарқынды дамуы адамзат өміріне терең еніп жатқанын айтып, жаңа дәуірдің талаптарына бейімделу қажеттігін жеткізді.
Сонымен қатар Қасым-Жомарт Тоқаев халықаралық құқықтың негізгі құжаты саналатын БҰҰ Жарғысына қатысты ұстанымын нақтылады.
Халықаралық құқықтың негізі саналатын БҰҰ Жарғысының бұлжымас беріктігі туралы жиі айтылады. Әйтсе де, ол – қалауыңа қарай тапсырыспен алдыратын жеңсік ас емес, – деді Президент.
Мемлекет басшысының айтуынша, Жарғыны тұтас әрі жан-жақты құжат ретінде қабылдап, оның ережелерін мүлтіксіз сақтау қажет. Осы тұрғыда БҰҰ мен басқа да халықаралық ұйымдар қазіргі әлемдегі бұрын-соңды болмаған әрі болжауы қиын өзгерістерді ескеруге тиіс.
Тоқаев халықаралық қағидаттарды өз мүддесіне қарай қолдануға жол бермеу керектігін атап өтті.
Біз БҰҰ Жарғысындағы қағидаттарды халықаралық қарулы қақтығыстарға қатысты өз ыңғайымызға қарай қолданудан аулақ болуымыз қажет, – деді ол.
Мемлекет басшысы көпжақты институттарға деген сенімнің әлсіреуіне жол бермеу маңызды екенін де жеткізді. Дегенмен, оның пікірінше, қазіргі таңда кейбір халықаралық мәселелерді шешуде бұл ұйымдардың ықпалы жеткіліксіз болып отыр.
