Пушкин атындағы облыстық кітапханада Ұлттық кітап күніне орай ерекше форматта тікелей эфир өтті, деп хабарлайды F16.kz.
Шараның басты мақсаты – кітаптың құндылығын дәріптеу, кітап оқу мәдениетін қалыптастыру және жастардың әдебиетке деген қызығушылығын арттыру.
«Түнгі студия» эфирі барысында көрермен кітап әлеміне терең үңіліп, жаңа туындылармен танысып, қызықты сұхбаттар мен мазмұнды пікірталастың куәсі болды.
Эфир барысында кітап оқудың маңызы, кітап апталығы аясында өтіп жатқан іс-шаралар, жаңа әдебиеттер мен оқырман сұранысына ие кітаптар туралы әңгіме өрбіттік. Сонымен қатар кітапхана жанынан құрылған «Ой-сана» әдеби жастар клубының жұмысы таныстырылып, кітап оқудың тұлғалық дамуға әсері кеңінен сөз етілді, — деді кітапхана қызметкерлері.
Бағдарлама барысында кітап туралы қызықты деректер, әлемдік әдебиеттегі рекордтар, оқудың адам денсаулығы мен ойлау қабілетіне ықпалы жөнінде мәлімет ұсынылды. Балалар әдебиеті, жасөспірімдерді кітап оқуға баулу жолдары, заманауи оқу форматтары туралы арнайы сұхбаттар ұйымдастырылды. Ән шырқалып, өлең оқыған рухани эфир оқырманға ерекше әсер қалдырды.
