Бүгін Пушкин атындағы облыстық кітапханада «Ұлы даланың Ұлы тұлғалары» дәстүрлі интерактивті әдебиеттер экспозициясы ашылды, деп хабарлайды F16.kz.
Облыс өміріндегі басты оқиғалар мен еңбегі сіңген мерейтой иелерін арқау еткен көрме бірнеше бөлімнен тұрады.
Мерейгер — мемлекет қайраткерлеріне арналған «Ұлт перзенті» бөлімінде қоғам қайраткері, Алаш қозғалысының жетекшісі Әлихан Бөкейханов, ақын, қоғам қайраткері, тілтанушы, Қазақстан халық жазушысы Олжас Сүлейменов, тұңғыш қазақ математик-профессор, қоғам және мемлекет қайраткері, «Алаш» партиясының негізін қалаушылардың бірі Әлімхан Ермеков және тағы да басқа мерейтой иелері туралы әдебиеттер қойылған.
«Өмір жырын шерте білген» бөлімінде қазақ халқының әдеби мұрасына сүбелі үлес қосқан қарымды қаламгерлер, жерлес ақын-жазушылар туралы мазмұнды да қызықты ақпарат жинақталған.
Халық жүрегінен мәңгі орын алған талантты тұлғалар жайлы «Өнермен өрілген өмір» бөлімі сыр шертеді.
Көрменің «Өр Алтайда ізі қалған тұлғалар» бөлімі тағдыры Шығыс Қазақстан өлкесімен тығыз байланысты мерейгерлерге арналды. Сонымен қатар, өңір үшін өзіндік орны бар облыстық «Дидар» газетінің шыққанына 95 жыл, Шығыстың бас кітапханасы – А.С. Пушкин атындағы Шығыс Қазақстан облыстық кітапханасының ашылғанына 130 жыл, Зайсан қаласында алғашқы кітапхананың ашылғанына 130 жыл, Өскемен қаласында Жамбыл атындағы облыстық драма театрының (қазіргі Шығыс Қазақстан облыстық драма театры) құрылғанына 90 жыл, ШҚО Абыралы ауданы шаруаларының күштеп ұжымдастыру және артық иемдену саясатына қарсы Абыралы көтерілісіне 95 жыл тәрізді атаулы күндер де күнтізбеден орын алған.
Көрме облыстық кітапханада жыл бойы жұмыс істейді.
