Өскеменде «Казцинк» компаниясының металлургиялық алаңында болған жарылыстан зардап шеккен кәсіпорын жұмысшыларының жағдайы туралы облыстық мамандандырылған медициналық орталық дәрігерлері айтты, деп хабарлайды F16.kz.
Орталықтың бас дәрігерінің орынбасары Мұрат Нұрбикеновтің сөзінше, таңғы сағат 8.30-8.40 шамасында жедел жәрдем қызметі зардап шеккен бірнеше адамды ауруханаға жеткізетіні туралы хабар түскен. Осыдан кейін тез арада реаниматолог, травматолог және өзге де мамандардан құралған топ жасақталған.
Ауруханаға бес адам жеткізілген, олардың төртеуі – еркек, біреуі – әйел. Бәріне қажетті медициналық тексеру жүргізілген, оның ішінде компьютерлік томография арқылы бас-ми жарақаты бар-жоғы анықталған. Үш адамның жарақаты жеңіл болып, тиісті көмек көрсетілгеннен кейін үйлеріне жіберілген.
Екі адам ауруханаға жатқызылды. 1981 жылы туған ер адам өте ауыр жағдайда, денесінің 90 пайыздан астамын күйік шалған, жоғарғы тыныс жолдары зақымданған, көздің қасаң қабығы күйген, қазір жансақтау бөлімінде жатыр.
Тағы бір науқас – 1974 жылы туған ер адам. Оның үшінші бел омыртқасы сынып, қосымша өсінділері зақымданған. Ол травматология бөліміне жатқызылды, – деді Мұрат Нұрбикенов.
Бұған дейін компания өкілдері оқиға салдарынан екі адамның қаза тапқанын, тағы бес адамның жарақат алғанын хабарлаған еді. Қазір оқиға орнында жедел қызметтер жұмыс істеп жатыр. Жарылыстың себептерін анықтау үшін арнайы комиссия құрылған.
