Бүгін ШҚО қоғамдық кеңесінің төрағасы, Конституциялық комиссия мүшесі Аяужан Әшімова бүгін өңір жастарымен кездесіп, Конституция жобасының мән-маңызын жан-жақты түсіндіріп, өзгерістерге кеңінен тоқталды, деп хабарлайды F16.kz.
Ашық диалог форматында ұйымдастырылған басқосу барысында қатысушылар елдегі саяси реформалардың мәні мен маңызына тоқталып, азаматтық жауапкершілік пен қоғамдық белсенділікті арттыру жолдарын ортаға салды.
Ата Заңның негізгі қағидаты — адамды, оның өмірі мен қадір-қасиетін ең жоғары құндылық ретінде тану.
Конституция — адам құқығы мен бостандығын қорғауға бағытталған басты құжат. Онда азаматтардың құқықтары мен бостандықтары қорғалады. Жаңа Конституцияда барлығы түсінікті, жеңіл түрде жазылуына мән бердік. Әрбір азамат оны оқып, өз құқығын түсінуі керек. Болашаққа қадам жасау үшін өз құқығын білу өте маңызды. Мәселен, отбасы туралы бапта отбасы институтына ерекше мән берілген. Неке мен отбасы, ана, әке және бала мемлекеттің қорғауында екені нақты көрсетілген, – деді Аяужан Әшімова.
Сондай-ақ спикер жастар да Конституциямен толық танысып, өз ортасына жеткізе білуге тиіс екенін атап өтті.
Жастар арасында қазір ақпаратты саралай білу өте өзекті. Қазір әлеуметтік желіде болсын, басқа ортада болсын ақпарат өте көп. Әр азамат, әсіресе жастар сол ақпараттарды сүзгіден өткізіп, дереккөздің сенімділігіне мән беруі қажет. Қоғамда негізсіз пікірлерге еріп кетпеу үшін саяси сауаттылықты дамыту маңызды, – деді ол.
Іс-шара барысында қатысушылар өз ой-пікірлерін еркін білдіріп, сарапшыларға көкейдегі сұрақтарын қойды.
Жиын қорытындысында қатысушылар мұндай диалог алаңдары қоғам мен билік арасындағы байланысты нығайтып, азаматтардың саяси мәдениетін қалыптастыруға оң әсер ететінін атап өтті.
