Жыл басынан бері облыс аумағындағы тұрғын үй секторларынан 427 өрт оқиғасы тіркелген. Олардың 150-і электр құралдары мен электр жабдықтарын пайдалану кезінде өрт қауіпсіздігі талаптарының сақталмауынан болған, деп хабарлайды F16.kz.
ШҚО ТЖД мамандарының айтуынша, талдау нәтижелері мұндай өрт оқиғаларына тұрғындардың қателіктері себеп болатынын көрсеткен.
Электр құралдарын қараусыз қосулы қалдыру, үйде бір мезетте бірнеше өткізгіш, ұзартқышты қосу, бір розеткаға бірнеше құралды қосу, электр құралдарын жанғыш заттардың қасына қою және тозған өрт қаупі жоғары жағдайда тұрған электр сымдарын пайдалану себептерінен тілсіз жаудан зардап шеккендер көп, — дейді ШҚО ТЖД Мемлекеттік өрт бақылау басқармасының бастығы Нұржан Өміржанов.
Құтқарушылар ескретеді:
– Кез келген электр құралын қолданбас бұрын нұсқаулықты мұқият оқыңыз;
– Құралдың пайдалану уақытына және рұқсат етілген ток шамасына назар аударыңыз;
– Бір розеткаға бірден компьютер, жылытқыш, шаңсорғыш қоссаңыз желіге түсетін жүктеме шамадан тыс болуы мүмкін екенін есте сақтаңыз;
– Ақаулы розеткаларды пайдаланбаңыз;
– Егер электр құралын қосқанда жарық аздап күңгірттенсе, бұл желінің шамадан тыс жүктелгенінің айқын белгісі;
– Үйден шығарда электр құралдарын ажыратыңыз.
