Риддер қаласының жылу жүйесін жақсарту бойынша жүйелі жұмыстар жалғасып жатыр. Алдағы жылыту маусымына дайындық барысын облыс әкімдігі ерекше бақылауға алды. Бұл туралы ШҚО әкімі Нұрымбет Сақтағанов Риддер тұрғындарымен есеп беру кездесуінде мәлім етті.
Биыл Риддер ЖЭО мен жылу желілерін жөндеуге Үкімет резерві және облыстық бюджет есебінен жалпы құны 2,6 млрд теңгеге тиісті жұмыстар жүргізіліп жатыр.
Қазір жалпы ұзындығы 3,3 шақырымды құрайтын жылу желілерінің 12 учаскесінде жөндеу жұмыстары атқарылып жатыр. Жөндеу науқанының негізгі мақсаты — жылумен қамту жүйесінің тозу деңгейін төмендетіп, жылыту маусымында апатты жағдайлардың туындау қаупін барынша азайту. Жоспарланған жұмыстар толық аяқталған жағдайда орталықтың тозу деңгейін 2025 жылғы 43,3%-дан 41,5%-ға дейін, ал жылу желілерінің тозуын 59,1%-дан 56,7%-ға дейін төмендету көзделіп отыр, — деді аймақ басшысы.
Айта кетейік, өткен жылы да Риддердің жылу энергетикасы нысандарында ауқымды жұмыстар жүргізілді. Соның нәтижесінде орталықтың тозу көрсеткіші 45,7%-дан 43,3%-ға, ал жылу желілерінің тозуы 66,8%-дан 59,1%-ға дейін төмендеді.
Нұрымбет Сақтағанов жылыту маусымына дайындықты сапалы әрі белгіленген мерзімде аяқтаудың маңыздылығын атап өтті. Осыған байланысты облыстық энергетика және тұрғын үй-коммуналдық шаруашылық басқармасына Риддер қаласының әкімдігімен бірлесіп, Риддер ЖЭО мен жылу желілеріндегі барлық жөндеу жұмыстарын уақтылы аяқтау, нысандардың жылыту маусымына сақадай сай дайындығын қамтамасыз ету және бөлінген қаражатты толық игеру тапсырылды.
