Ағымдағы жылдың 10 айының қорытындысы бойынша елімізде 360 мың тоннадан астам құс еті өндірілді, бұл өткен жылдың сәйкес кезеңімен салыстырғанда 7,2%-ға көп, деп хабарлайды F16.kz тілшісі Ауыл шаруашылығы министрлігіне сілтеме жасап.
Құс шаруашылығы – мемлекетіміздің агроөнеркәсіп кешеніндегі ең қарқынды дамып келе жатқан салалардың бірі. Қазіргі уақытта Қазақстанда жұмыртқа бағытындағы 43 құс фабрикасы, ет өндіретін 36 кәсіпорын және 7 асыл тұқымды шаруашылық жұмыс істейді. Олардың үшеуі бройлер, үшеуі жұмыртқа бағытында, ал біреуі үйрек шаруашылығы санатында.
Ұлттық статистика бюросының деректері бойынша, биылғы 1 қазанда елдегі үй құсының саны 49 миллионға жетті, бұл өткен жылмен салыстырғанда 6,5%-ға артық.
Айта кетейік, өткен жылы 4,5 миллиард дана тағамдық жұмыртқа өндіріліп, ішкі нарық толықтай қамтамасыз етілген. Сол жылы құс еті өндірісі 360 мың тоннаға жетті.
– Инвестициялық жобалардың арқасында соңғы бес жыл ішінде елді құс етімен қамтамасыз ету деңгейі 58%-дан 79%-ға дейін артты, – деп жазады министрліктің баспасөз қызметі.
Ведомстводан хабарлағандай, қазір аталмыш сала мемлекет тарапынан айтарлықтай қолдауға ие болып отыр. Атап айтсақ, жануар шаруашылығын субсидиялау қағидалары аясында өндірушілерге бірқатар қолдау шаралары көрсетіледі.
Ет бағытындағы құс шаруашылығында асыл тұқымды балапандар сатып алуға және құс еті өндірісінің өзіндік құнын арзандатуға субсидиялар қарастырылған, ал жұмыртқа бағытында соңғы буындағы балапандар сатып алуға субсидиялар бөлінеді.
