Шығыс Қазақстан облысында көктемгі су тасқынына қарсы жоғары дайындық режимі жарияланды, деп хабарлайды F16.kz.
Төтенше жағдайлар қызметінің мәліметінше, қарғын суға қарсы жедел әрекет ету үшін азаматтық қорғау күштері күшейтілді. Қазір шамамен 3700 адамнан тұратын арнайы топ жасақталған.
Сонымен қатар өңірде 240-қа жуық мотопомпа, құтқарушылар мен жергілікті атқарушы органдардың 75 жүзу құралы және 500-ден астам техника әзір тұр. Бұдан бөлек, 58,7 мың дана қап, 9957 тонна инертті материал және 386 тоннадан астам жанар-жағармай қоры дайындалған.
Мамандардың айтуынша, алдын алу шаралары аясында 258 мың текше метрден астам қар шығарылды. Өзен-көлдер мен су айдындарында тұрақты мониторинг жүргізіліп жатыр.
ШҚО төтенше жағдайлар департаменті жағдай бақылауда екенін және қажетті күш-құралдар толық дайын тұрғанын мәлімдеді.
