Облыс орталығында қолайсыз ауа райының салдарын жою жұмыстары жалғасып жатыр. Коммуналдық қызметтер күшейтілген режимге көшті, деп хабарлайды F16.kz.
Өскемен қаласы әкімінің баспасөз қызметінің мәліметінше, қаланың тұрғын үй қоры мен әлеуметтік нысандарындағы авариялық-қалпына келтіру жұмыстары толық аяқталған. Электр энергиясы өшірілген барлық аудандарда электрмен жабдықтау толық қалпына келтірілді.
Апаттық қалпына келтіру жұмыстарына 270 адам мен 41 техника жұмылдырылды. Қолайсыз ауа райы салдарынан 25 мыңға жуық адам электр жарығынсыз қалған. Сондай-ақ 15 ағаш құлады. Кей көшелерді су басу фактілері тіркелді. Түскен өтінімдер бойынша су сору жұмыстары жалғасуда, — деді Өскемен қаласының әкімі Алмат Ақышов.
Қазіргі уақытта Понтон көпірі маңы, Самсоновка кенті және Лесхоз кентіндегі жеті саяжай кооперативінде, жеке сектордағы нүктелік өтінімдер бойынша 0,4 кВ және әуе электр желілеріндегі зақымдарды жою жұмыстары жүргізіліп жатыр.
Қала бойынша жалпы баланста 112 бағдаршам болса, дауыл салдарынан 36-сы істен шыққан. Бүгін таңертеңгі жағдай бойынша, 29 бағдаршам қалпына келтірілді.
Құлаған ағаштарды жинау бойынша барлық учаскеде жұмыстар аяқталды. Қазір алты учаскеде көше жарығы қалпына келтіріліп жатыр, — дейді қала әкімінің баспасөз қызметі.
Одан бөлек, түскен өтінімдер бойынша 4 учаскеде су сору жұмыстары әлі де жалғасуда.
