Тарбағатай ауданына қарасты Тұғыл ауылының тұрғыны үйінде тыйым салынған есірткі заттарын сақтаған, деп хабарлайды F16.kz.
Тарбағатай ауданының полиция қызметкерлері жергілікті тұрғындардың бірінің тұрғылықты жерінде тыйым салынған заттарды сақтауы мүмкін екендігі туралы жедел ақпарат алған.
Тұғыл ауылының тұрғынынан тексеру барысында шаруашылық құрылыстарынан жасыл түсті заттың қалдықтары бар металл ыдыстар, ерекше иісі бар заттар мен кептірілген өсімдік тектес зат табылып, тәркіленді. Сараптама қорытындысына сәйкес, тәркіленген зат кептірілген марихуана болып шықты. Оның жалпы салмағы 279,60 грамды құрады, — дейді ШҚО ПД баспасөз қызметі.
Қазіргі уақытта аталған факті бойынша сотқа дейінгі тергеу амалдары жүргізіліп, барлық мән-жайлар анықталып жатыр.
Шығыс Қазақстан облысы ПД есірткі құралдарын заңсыз сақтау және айналымы қылмыстық жауапкершілікке әкеп соғатынын еске салады.
