Қазақстанда 38 миллион тоннаға жуық мал азығы дайындалды. Бұл туралы Ауыл шаруашылығы министрлігінен хабарлайды, деп жазады F16.kz.
Жергілікті атқарушы органдардың деректеріне сүйенсек, елімізде барлығы 37,8 миллион тонна мал азығы дайындалған. Оның ішіндегі 25 миллион тоннасы – шөп (101,9 %), 1,9 миллион тоннасы – пішендеме (112,9 %), 3,9 миллион тоннасы – құрама жем (71,7 %), 2 миллион тоннасы – сүрлем (102,3 %), 4,8 миллион тоннасы – сабан (101,7%).
Жоспардың орындалуы бойынша Солтүстік Қазақстан, Шығыс Қазақстан, Алматы, Қызылорда, Жамбыл, Қостанай, Павлодар, Ұлытау және Жетісу облыстары жоғары нәтижелер көрсеткен.
– Дайындалған мал азығының көлемі 2025-2026 жылдардағы мал қыстату науқанын қолайлы өткізуге және мал шаруашылығы кәсіпорындарын тұрақты түрде жем-шөппен қамтамасыз ету үшін қажетті қор жасауға мүмкіндік береді, – деп жазады министрліктің баспасөз қызметі.
