ҚР Парламент Мәжілісінің депутаты Нартай Сәрсенғалиев елімізде пранк жасаймын деп қоғамдық тәртіпті бұзатындар көбейіп кеткенін айтты, деп хабарлайды F16.kz.
Пранк жасағандардың бірнеше мысалын келтірген «AMANAT» партиясы Фракциясының мүшесі Ішкі істер министрі Ержан Сәденов пен Мәдениет және ақпарат министрі Аида Балаеваға депутаттық сауал жолдап, ұсыныс айтты.
Депутаттың пікірінше, пранк барысында қоғамдық тәртіпті бұзғандарды, жеке адамның өміріне қол сұққандарды анықтап, олардың бірыңғай тізімін жасап, жариялау қажет.
Сондай-ақ қауіпті пранк арқылы адамның ар-намысы мен абыройына қол сұққандардың әлеуметтік желідегі парақшаларын дерек бұғаттау керек.
Ал әлеуметтік желі әкімшілерінен қауіпті пранктер мен бейнежазба жарияланған парақшаларды анықтап, уәкілетті органға жедел хабарлауды талап ету қажет.
Сол сияқты осындай теріс құбылыстардың алдын алу мақсатында ақпараттық-түсіндіру жұмыстарын жүйелі түрде, нәтиже беретін контент ретінде жүргізу керек.
