Өскемендегі металлургиялық кәсіпорындардың бірінде болған жарылыстың экологияға ешқандай әсері жоқ. Бұл туралы «Казцинк» ЖШС—ның әкімшілік мәселелер жөніндегі басқарушы директоры Андрей Лазарев айтты, деп хабарлайды F16.kz.
Апатты жағдай металлургиялық шаң-тозаңнан болды. Яғни, шаң – газ емес. Экология департаментінің мамандары да тексерді, «Казцинктің» ішкі зертханасында да зерттеу жүргізілді. Нәтижесінде ауаға зиянды заттардың таралмағаны анықталды. Қазір кәсіпорын аумағы толық қоршалып, құтқару-іздестіру жұмысы жүргізіліп жатыр, – деді Андрей Лазарев.
Оқиға орнында тексеру жүгізген облыстық экология департаментінің мамандары да ауаға ластаушы заттар таралмағанын растады.
«Казцинк» ЖШС аумағындағы жағдайға байланысты экология департаментінің мамандары оқиға орнында қажетті талдаулар мен өлшеулер жүргізді. Нәтижесінде рұқсат етілген нормалардың аздаған асып кетуі тіркелгенімен, қауіпті ластаушы заттардың бөлінуі анықталған жоқ. Халық үшін ешқандай қауіп пен тәуекел жоқ, — деп мәлімдеді экология департаментінің баспасөз қызметі.
Бұған дейін жазғанымыздай, бүгін таңертең Өскемендегі зауыттардың бірінде жарылыс болып, өрт шыққан. Төтенше жағдайлар министрлігінің баспасөз қызметі жарылыс зауыт цехындағы шаң тұту құрылғысында газ-ауа қоспасынан болғанын хабарлады. Соның салдарынан өрт шығып, нысанның қабырғасы опырылған.
Құтқарушылар оқиға орнына жеткен кезде нысан өртеніп жатқан. Қазір апат болған жерде Төтенше жағдайлар министрлігінің бөлімшелері жұмыс істеп жатыр. Жедел штаб құрылды.
