Тарбағатайдағы «Жайсаң» жағажайында алғашқы жұмыстар басталды. Онда күні кеше демеушілердің қолдауымен су бұрғылау жұмыстары жүргізілді, деп хабарлайды F16.kz.
Аудан әкімдігінің мәліметіне сүйенсек, 54 метр тереңдіктен ішіуге жарамды таза ауыз су шыққан. Алдағы уақытта тағы осындай екі су көзі бұрғыланбақ.
Жергілікті билік өкілдері туризмнің дамуына тың серпін береді деп күткен «Жайсаң» жағажайы жоспар бойынша алдағы екі жылда толығымен аяқталуға тиіс.
Келесі аптада келісімшарт жасалып, шілдеден бастап демеушілер көмегімен электр энергиясы тартылады. Одан кейін құрылыс жұмыстарын толық бастауға мүмкіндік болады, — деді Тарбағатай аудандық ауыл шаруашылығы, жер қатынастары және кәсіпкерлік бөлімінің басшысы Мейрамбек Мұқатов.
Бүгінде аукцион арқылы 30 жер учаскесі берілген. Қазір құжаттары дайындалып жатқан тағы 14 жер учаскесі алдағы уақытта аукционға шығарылады.
