Шығыстың бас шаһарындағы Қазақстан тауына аспалы жол салу идеясы бұрыннан айтылып келеді. Енді осы жоспарды жүзеге асыратын уақыт жетті. Өскемен әкімдігі іске кірісті, деп хабарлайды F16.kz.
Жуықта қала әкімі Алмат Ақышов жобаны қолға алуға ниетті компания өкілдерімен кездесіп, мәселені талқылады.
Bartholet Maschinenbau AG компаниясының серіктесі Артур Шахбазянмен кездесу өткіздік. Қазақстан тауына барып, қалалық аспалы жолдың алғашқы желісін іске қосу мүмкіндіктерін техникалық және жоспарлау тұрғысынан қарастырдық. Жобаның бірінші кезеңінде Қазақстан тауы мен амфитеатрды немесе Славский жағалауын қосу ұсынылды. Ал болашақта бұл желіні қаланың көлік жүйесіне біріктіру көзделген. Қазір жоба жоспарлау сатысында болғанымен, оның қалалық инфрақұрылымның маңызды бөлігіне айналатыны анық. – деп хабарлады қала әкімі Instagram желісіндегі парақшасында.
Шаһар басшысының айтуынша, бұл жоба көлік пен туризмді қатар дамытатын шешім болмақ. Алдын ала есептеулерге сүйенсек, аспалы жол жылына 7 миллионнан астам жолаушыны тасымалдай алады. Бұл жол қозғалысына түсетін салмақты азайтып, туризм мен қоғамдық кеңістіктердің дамуына серпін береді.
