Денсаулық сақтау министрлігі қазақстандықтарды жыл сайынғы скринингтік зерттеп-тексеруден өтуге шақырады, деп хабарлайды F16.kz.
«Халық денсаулығы және денсаулық сақтау жүйесі туралы» Кодекстің 80-бабының 3-тармағына сәйкес, Қазақстан Республикасының азаматтары профилактикалық медициналық қарап-тексеруден және скринингтік зерттеулерден өтуге міндетті.
Сонымен қатар, осы жылдан бастап міндетті әлеуметтік медициналық сақтандыру жүйесіндегі мәртебесіне қарамастан, онкоскринингтер барлық азаматқа қолжетімді екенін айта кеткен жөн.
Зерттеп-тексерулер жүрек-қан тамырлары ауруларын, қант диабетін, глаукоманы, сүт безі, жатыр мойыны мен ішек обырын, В және С вирустық гепатиттерін, цереброваскулярлық бұзылуларды және басқа да қауіпті патологияларды ерте анықтауға бағытталған. Жас санаттары мен жиілігін дәрігер медициналық стандарттарға сәйкес анықтайды.
– Сіз скринингтен өзіңіздің емханаңыздан да өте аласыз, ол үшін жаныңызда жеке куәлігіңіз болса жеткілікті. Қабылдауға call-орталық немесе Дамумед мобилдік қосымшасы арқылы жазылуға болады, – деп жазады Денсаулық сақтау министрлігінің баспасөз қызметі.
Негізінен учаскелік дәрігерлер мен мейіргерлер жас және басқа өлшемшарттар бойынша тізімдер жасай отырып, халықты өздері шақырады.
Скринингтен кім және қашан өтеді?
- жүрек-қантамыр жүйесінің аурулары: артериялық гипертония және жүректің ишемиялық ауруы – 40 пен 76 жас аралығындағы ерлер мен әйелдер;
- эндокриндік аурулар: қант диабеті – 40 пен 76 жас аралығындағы ерлер мен әйелдер;
- көру ағзаларының аурулары: глаукома – 40 пен 76 жас аралығындағы ерлер мен әйелдер;
- онкологиялық аурулар: сүт безі обыры – 40 пен 76 жас аралығындағы әйелдер; жатыр мойыны обыры – 30 мен 74 жас аралығындағы әйелдер; колоректалдық обыр – 50 мен 76 жас аралығындағы ерлер мен әйелдер;
- вирустық инфекциялар: В және С вирустық гепатиті – медицина қызметкерлері; жоспарлы және шұғыл операцияларға түсетін пациенттер; гемодиализ, гематология, онкология, транспланттау, жүрек-қан тамырлары және өкпе хирургиясы орталықтары мен бөлімшелерінің пациенттері; ағзаларды, тіндерді, жасушаларды гемотрансфузия және транспланттау жүргізілетін адамдар; жүкті әйелдер;
- цереброваскулярлық бұзылулар – 50 жастан 76 жасқа дейінгі ер адамдар.
