Бүгін Қасым Қайсенов кентінде тұрғындар көптен күткен жаңа емхана ашылды, деп хабарлайды F16.kz.
Аудан тұрғындар медициналық мекеменің ашылғанына дән риза. Себебі Ұлан аудандық ауруханасы Таврия ауылдық округінде орналасқан. Ал, Қасым Қайсенов кентінің тұрғындары жылдар бойы тұрғын үйдің екінші қабатында орналасқан амбулаторияда ем алып келген.
Соңғы жылдары өңірде денсаулық сақтау нысандарын жөндеу, жабдықтау және жаңадан салу жұмыстары қарқынды жүргізіліп келеді. «Ауыл – Ел бесігі» мемлекеттік бағдарламасы мен «Ауылдық денсаулық сақтауды жаңғырту» ұлттық жобасы аясында Ұлан ауданында 5 жаңа медициналық пункт салынды, 4 амбулатория жөндеуден өтті. Бүгін ауысымына 150 адам қабылдай алатын, жалпы ауданы 3853 шаршы метрді құрайтын жаңа емхана пайдалануға берілді. Заманауи емхана тұрғындардың өмір сапасын жақсартуға бірден бір әсер етеді деп сенеміз, – деді аймақ басшысы.
Жаңа емхана ғимараты заманауи стандарттар мен технологияларға сай жабдықталған.
Диагностика жүргізу үшін микробиологиялық және серологиялық зерттеулер жүргізуге мүмкіндік беретін бактериологиялық зертхана қарастырылған.
Емханада ФГДС, колоно және видеоколоноскопия, рентген, маммография, флюорография, УДЗ, физиотерапия кабинеттері жұмыс істейді.
Мекеме құрамына қысқа мерзімді емделуге арналған күндізгі стационар, жоспарлы және шұғыл операциялар жасалатын ота блогы, стоматологиялық және хирургиялық кабинеттер кіреді. Сонымен қатар, терапевт кабинеті мен төрт шақыру санаты бойынша шұғыл медициналық көмек бөлімі өз жұмыс істей бастады.
Жедел жәрдем қызметінің тиімді жұмыс істеуі үшін екі санитарлық автокөлікке арналған гараж ғимараты салынған. Жақын арада жедел жәрдем станциясын да жаңа емхана ғимаратына көшіру жоспарланып отыр.
