Катонқарағай ауданында «Алтай – түркі әлемінің алтын бесігі» халықаралық фестивалі аясында ұйымдастырылған суретшілер байқауы мәресіне жетті, деп хабарлайды F16.kz.
Төр Алтайдың тумалары, көрнекті қаламгерлер – Қалихан Ысқақтың 90 жылдық және Дидахмет Әшімханұлының 75 жылдық мерейтойына орайластырылған байқауға республикамыздың түпкір-түпкірінен келген суретшілер қатысып, өз туындыларын көпшілік назарына ұсынды.
Байқау соңында шығармалары үздік деп танылған суретшілер «Катонқарағай ауданының тұрақты дамуы» қоғамдық қорының директоры Серік Жүнісовтің қолынан ақшалай сыйлықтар мен сертификаттар алды.
Ал енді байқау жүлдегерлеріне тоқталсақ, Катонқарағай жеріндегі қылқалам шеберлері арасындағы бұл жолғы сайыста бірінші орынды Әлішер Жүргенов жеңіп алса, екінші орынға Санжар Сырғабаев көтерілді. Үздік үштікті Талғат Қисметов түйіндеді.
Сондай-ақ байқауға қатысқан өзге де суретшілер түрлі аталымдар бойынша марапаттарға ие болғанын айту керек.
