Шығыс Қазақстанда биыл жол құрылысы саласында бірнеше ірі жоба жүзеге асырылды, деп хабарлайды F16.kz порталы 24.kz-ке сілтеме жасап.
Атап айтқанда, шекара шебіндегі Зайсан, Тарбағатай аудандарының халқы 10 жылға жуық уақыт бойы асыға күткен Омбы-Майқапшағай жолы салынып, қолданысқа берілді. Ұзаққа созылған Талдықорған – Өскемен тас жолы да аяқталды. Сонымен қатар шекарадағы екі ауданда өткізу бақылау пунктері жаңартылды.
Сонымен қатар өңірде Өскемен-Алтай-Үлкен Нарын-Катонқарағай-Рахман қайнары бағытындағы республикалық жолдың Осинов асуын аналып өтетін жаңа жол құрылысы жүргізіліп жатыр. «ҚазАвтоЖол» ҰК ШҚО филиалы директорының орынбасары Әділет Жампейісовтің айтуынша, бірнеше жылдан бері созылып келе жатқан жол құрылысы келер жылы толық аяқталу керек.
Бұл жоба 2017 жылы басталып, үш жылдан соң аяқталу керек еді. Ең алдымен сол жол бөлігі салынып жатқан жер орман учаскесіне тиесілі болғандықтан, соны теңгерімге алу үшін көп уақыт кетті. Қағазбастылық қанша уақытты алды. Сөйтіп, ол жоба тек 2023 жылы қайта басталды. Жап-жақсы жүрді. Асфальт төсеп, құрылыстың ең қиын жеріне жеткенбіз. Яғни Пихтовка өзені үстінен өтетін көпір салыну керек еді. Дәл осы көпірді жобалау барысыныда геологиялық есептеулерден шикілік шыққан. Өйткені ол жердегі тау жынысы өзгеше болды. Жартасты аумақ. Тым көп қосымша жұмыстарды талап етті. Оның барлығы жобада болмаған еді. Сөйтіп, енді құжатқа өзгеріс енгізуге тура келді. Салдарынан құрылыс межелі уақытында аяқталмады. Енді тек келер жылдың соңында бітеді, — деді ол.
