Өскеменнің №2 сотында Шығыс Қазақстан облысының бұрынғы көлік прокурорына қатысты үкім шықты. Экс—прокурор сотта 30 млн теңге алғанын мойындады. Оған 3 жыл 9 ай бас бостандығын шектеу жазасы тағайындалды, деп хабарлайды F16.kz.
Cотталушыға аса ірі көлемде алаяқтық жасады деген (ҚР ҚК-нің 190-бабы, 4-бөлігінің 2-тармағы, 24-бабы 3-бөлігі) айып тағылды. Ол басқа ведомство алып қойған құжаттарды қайтару үшін қомақты ақша алған.
Сот материалдарында көрсетілгендей, бұрынғы көлік прокуроры өзінің «құжаттарды қайтаруға құзыреті мен мүмкіндігі жоқ екенін анық біле тұра, заңсыз материалдық сыйақы алу үшін өзінің көлік жүргізушісінің ұялы телефоны арқылы акционерлік қоғам өкілін алдап, оған құжаттарды қайтаруға көмектесе алатыны туралы жалған ақпарат берген. Сонымен қатар 30 млн теңге көлемінде ақша беру қажеттігін айтқан. Бірақ сөзінде тұра алмаған. Ақыры оның үстінен көмек сұраған адам және өзінің көлік жүргізушісі ҰҚК-ның ШҚО бойынша департаментіне арыз жазған.
Дәлелдемелердің бұлтартпастығын қамтамасыз ету үшін арыз иелеріне 20 миллион теңге көлемінде жалған ақша берілді, ал қалған 10 миллион теңгені акционерлік қоғам өкілі шынайы купюралармен қосты. Бұл ақша жүргізушіге табысталды, ол өз кезегінде бастыққа қаражаттың алынғаны туралы хабарлаған. Содан кейін прокурор ол ақшаны көліктен алып, жүргізушінің үйінде сақтауды тапсырған, яғни ұрланған ақшаны иемдену туралы нұсқау берген.
Сотта бұрынғы прокурор кінәсін толық мойындап, жасаған ісіне өкінетінін айтты және бостандығынан айырмайтын жаза тағайындауды сұрады.
Сот айыпталушының шын ниетпен кінәсін мойындағанын, екі баласы барын, жұмыс орнынан берілген жағымды мінездемені ескеріп, оған 3 жыл 9 айға бас бостандығынан айыру жазасын тағайындады. Сотталушы жазасын орташа қауіпсіздік деңгейіндегі түзеу мекемесінде өтейді.
Сонымен қатар оған өмір бойына лауазымды мемлекеттік қызмет атқаруға тыйым салынды және әділеттің кіші кеңесшісі арнайы шенінен айырылды. Мүлікті тәркілеу тағайындалмады, себебі прокурордың атына тіркелген ешқандай мүлік анықталмаған. Ол үкім шығарылған сәтте сот залында қамауға алынды.
Үкім заңды күшіне енген жоқ, апелляциялық шағым берілді.
