Жазғы маусым кезінде су айдындарындағы жазатайым оқиғалардың алдын алу мақсатында облыстық Төтенше жағдайлар департаментінің мамандары, көліктік бақылау инспекциясы және полиция қызметкерлерімен бірлесіп, жаппай демалыс орындарын патрульдеу жұмыстарын күшейтеді, деп хабарлайды F16.kz.
Облыстық ТЖД баспасөз қызметінен хабарлағандай, жақында сондай рейдттің бірі Бұқтырма су қоймасының жағалауында жүргізілді. Бұл жолы мамандар демалушылардың суда және шағын көлемді кемелерде қауіпсіздік шараларын қаншалықты сақтайтынын тексерді.
Рейд барысында ҚР «Әкімшілік құқық бұзушылық туралы» Кодексі 592-бабының 1-бөлігін бұзудың фактілері анықталды.
– Демалушылардың арасында әсіресе катамаран мен басқа да жүзу құралдарына мінген кезде кеудеше кимеу, шектеу қалтқыларынан асып кету сияқты құқықбұзушылықтар жиі кездеседі, – дейді ТЖД бастығының орынбасары Исхар Савазов.
Айта кетейік, жаз басынан бері мамандар 460-қа жуық патрульдеу мен рейдтерге шыққан. Патрульдеу барысында құтқарушылар 6 адамды судан құтқарып қалған.
