Сыбайлас жемқорлыққа қарсы қызмет қайтарылған активтер есебінен салынған әлеуметтік нысандарға баспасөз турын өткізді, деп хабарлайды F16.kz.
Аталған іс-шара барысында мемлекет меншігіне қайтарылған активтер есебінен жүзеге асырылған әлеуметтік маңызы бар нысандар таныстырылды.
Баспасөз турын өткізудегі негізгі мақсат – халықты жемқорлардан тәркіленген қаражат есебінен салынған жаңа әлеуметтік нысандардың (мүмкіндігі шектеулі балаларға арналған балалар орталықтары, мектептер және т.б.) қызметімен таныстыру.
Бұл азаматтардың мемлекеттік институттарға деген сенімін нығайтуға және бюджеттік қаражаттың ашық пайдаланылуын арттыруға септігін тигізеді.
Іс-шараға журналистер, қоғам белсенділері, блогерлер, азаматтық қоғам өкілдері және басқа да адамдар қатысты. Баспасөз туры барысында қатысушылар жемқорлардан тәркіленген қаражат есебінен салынған нысандармен танысты. Қайтарылған мемлекеттік активтердің қоғам игілігіне қызмет етіп, елдің дамуына үлес қосатыны көзбе-көз көрсетілді.
Заңсыз шығарылған активтерді қайтару жұмысы агенттіктің маңызды міндеттерінің бірі болып қала береді.
2022 жылдан бастап қазірге дейін сыбайлас жемқорлыққа қарсы қызмет мемлекетке жалпы сомасы 1,15 трлн теңгеден астам көлемде мүлік активтері мен қаржыны қайтарды. Қайтарылған активтер қатарына бизнес орталықтар, әкімшілік ғимараттар, сауда орындары, тұрғын үйлер, пәтерлер, құрылысы аяқталмаған нысандар, жер учаскелері, люкс санатындағы автокөліктер және қаржылық қаражаттар кіреді.
Мемлекет басшысының тапсырмасына сәйкес, Сыбайлас жемқорлыққа қарсы қызмет арқылы қайтарылатын барлық активтер тек мемлекет мүддесіне бағытталатынын атап өткен жөн. Мысалы, Алматыда: Maisat бизнес орталығы еліміздің «География және су қауіпсіздігі институты» АҚ меншігіне берілді. Құны 7,9 млрд теңгеден асатын KaisarTower бизнес орталығы Қазақ ұлттық қыздар педагогикалық университетінің иелігіне тапсырылды. Құны 800 млн теңгеден асатын әкімшілік ғимарат Т.Жүргенов атындағы Қазақ ұлттық өнер академиясының балансына берілді. Ал Астанадағы құны 5 млрд теңгеден асатын үш жеке үй қала әкімдігінің мүгедектігі бар балаларға арналған «Психологиялық-педагогикалық түзету кабинеті» КММ-не берілді.
Сонымен қатар, Білім инфрақұрылымын қолдау қорының жұмысы бақылауда тұр, оның арнайы шотына 153,3 млрд теңге (немесе 329 млн доллар) аударылған. Қордың қаражаты есебінен барлығы 100 мың орындық 89 мектептің құрылысы қаржыландырылған. Оның ішінде 61 мектеп пайдалануға берілген, 2025 жылы тағы 28 жаңа мектеп салу көзделген.
Қаржыландырудың тағы бір көзі — «Арнайы мемлекеттік қор», ол мемлекет меншігіне қайтарылған мүліктің сатылымынан түскен қаражаттар мен басқа түсімдер есебінен толтырылады.
Сыбайлас жемқорлыққа қарсы қызмет заңсыз алынған активтерді қайтару жұмысын жалғастырады.
