Қазақстанда жыл сайын балалар арасында 800-ден астам онкологиялық және гематологиялық аурулардың алғашқы белгілері анықталады. Олардың шамамен 600-і қатерлі ісіктерге, соның ішінде гемобластоздарға, ал 200-ге жуығы ауыр сипаттағы қатерсіз гематологиялық патологияларға тиесілі, деп хабарлайды F16.kz тілшісі.
Денсаулық сақтау министрлігінен хабарлағандай, соңғы 10 жыл ішінде балалар арасындағы қатерлі жаңа өскіндерге шалдығу деңгейі тұрақты сақталуда және 100 мың балаға шаққанда 9,7 жағдайды құрайды.
Қатерлі ісіктер түрлеріне келетін болсақ:
- жедел лейкоздар – 30%-дан астам;
- орталық жүйке жүйесінің ісіктері – шамамен 17%;
- лимфомалар мен нефробластомалар – 10-11%;
- нейробластомалар – шамамен 7%.
– Иммунотерапия мен таргеттік терапияны қоса алғанда, заманауи емдеу әдістерін енгізудің нәтижесінде Қазақстанда балалар арасындағы қатерлі ісіктерден аман қалу көрсеткіші 70%-дан асады, – деп хабарлайды дерек көзі.
Соңғы 5 жылда 40-тан астам бала нейробластома, лимфома және лейкозды емдеуде моноклоналды антиденелерге негізделген инновациялық дәрілік препараттар алған.
