Мемлекет басшысы Қасым-Жомарт Тоқаев адамның бет-жүзін жасыратын киім киюге шектеу қоятын заңға қол қойды. Енді мұндай киімді қоғамдық орындарда киюге ресми түрде тыйым салынды, деп хабарлайды F16.kz.
Тиісті норма «Құқық қорғау қызметін, арнайы және ішкі істер органдары қызметін жетілдіру, артық заңнамалық реттеуді жою және әскери қызметшілер мен азаматтық қорғау саласы қызметкерлерін әлеуметтік қамтамасыз ету» туралы заң аясында қабылданды.
Заң мәтініне сәйкес, қоғамдық орындарда адамның түр-сипатын тануға кедергі келтіретін киімдерді киюге тыйым салынады. Бұл шектеу қызметтік, медициналық, ауа райына байланысты, мәдени және спорттық іс-шараларға қатысушыларға қолданылмайды.
Еске сала кетсек, аталған түзету маусым айының басында Сенаттың талқылауында ұсынылған. Енді ол заң жүзінде бекітіліп, қолданысқа енгізілді.
