Қазақстанда қызылша ауруына шалдыққандар көбейді. Жыл басынан бері елде 3 343 адам ауырған, оның 84,2%-ы — 14 жасқа дейінгі балалар. Осыған байланысты биылғы 19 ақпанда Қазақстанның бас мемлекеттік санитария дәрігері Сархат Бейсенова «Қазақстанда қызылшаға қарсы санитариялық-эпидемияға қарсы және санитариялық-профилактикалық іс-шараларды ұйымдастыру және жүргізу туралы» қаулыға қол қойды.
Денсаулық сақтау министрлігі Санитариялық-эпидемиологиялық бақылау комитетінің мәліметінше, қызылша жұқтырғандардың басым бөлігі вакцина алмағандар. Атап айтқанда, жағдайлардың 77,6%-ында (2 594 адам) балалар екпе алмағаны белгілі болды. Оның ішінде:
- вакцинациядан бас тарту – 1 448,
- медициналық қарсы көрсетілімдер – 325,
- екпе жасына жетпеуіне байланысты – 778,
- өзге себептермен – 43.
- мәртебесі белгісіз – 398.
Эпидемиологиялық жағдайды тұрақтандыру мақсатында Қазақстан Республикасының Бас мемлекеттік санитариялық дәрігерінің 2026 жылғы 19 ақпандағы № 3 «Қазақстан Республикасында қызылша бойынша санитариялық-эпидемияға қарсы және санитариялық-профилактикалық іс-шараларды ұйымдастыру және өткізу шаралары туралы» қаулысы қабылданды.
Құжатта қызылшаға, қызамыққа және паротитке қарсы иммундауды кеңейту көзделген:
- 6 айдан 10 ай 29 күнге дейінгі балалар — жағдай тұрақтанғанға дейін;
- Ұлттық профилактикалық екпелер күнтізбесіне сәйкес егілмеген 2–5 жас және 7–18 жас аралығындағы балалар — толықтыра иммундауы аясында;
- екпесі жоқ немесе олар туралы деректері жоқ 30 жасқа дейінгі медицина қызметкерлері мен денсаулық сақтау ұйымдарының қызметкерлері.
Вакцинация егілетін адамның немесе оның заңды өкілінің ақпараттандырылған келісімі алынғаннан кейін ғана жүргізіледі.
Сондай-ақ балаларды жоспарлы түрде ауруханаға жатқызуға қойылатын талаптар күшейтілді. Ұйымдастырылған ұжымдарда, әскери бөлімдерде және білім беру ұйымдарында қызылша жағдайлары тіркелген кезде егілмеген адамдарды уақытша шеттету қоса алғанда, эпидемияға қарсы және профилактикалық іс-шаралар жедел түрде қамтамасыз етіледі.
