Бүгін таңертең Өскеменнің Жеңіс саябағы адамға лық толды. Ақ жейде киген жастардың қимылы ширақ, көңіл-күйі көтеріңкі. Кенет аспанға «Чемпиондық рух» деген жазуы бар әуе шары көтерілді. Қала тұрғындары мен қонақтары ерекше бір спорттық шараның куәсі болды, деп хабарлайды F16.kz.
Жан мен тәнді сергіткен жақсы бастамаға AMANAT партиясы жанындағы «Жастар Рухы» жастар қанатының Шығыс Қазақстан облыстық филиалы мен Aqtai judo club спорт клубы мұрындық болды. Ал оның атауы – «Чемпиондық рух». Республика көлемінде қолға алынған бұл жоба жай ғана спорттық шара емес, ішкі тәртіпті шыңдап, жастарды шыдамдылыққа тәрбиелейтін ерекше шара. Мақсат – жастар арасында салауатты өмір салтын насихаттау, спорттың маңызы мен өзектілігін түсіндіру, дүбірлі додаларда ел намысын қорғаған саңлақтардың еңбегін дәріптеу, олардың беделін арттыру және оң имиджін қалыптастыру.
Ертіс пен Үлбінің қосылған тұсындағы ашық аспан астында өткен мерекеге құрметті қонақ ретінде халықаралық аренада еліміздің туын көтеріп жүрген мақтаныштарымыз, дзюдодан спорт шебері, дүниежүзілік ойындардың күміс жүлдегері, самбодан Қазахстан және әлем чемпионаттарының екі дүркін жүлдегері, Aqtai judo club спорт клубының негізін қалаушы Руслан Ақтаев, дзюдодан еңбек сіңірген спорт шебері, Азия чемпионатының күміс жүлдегері, 2000 жылғы (Сидней) Олимпиада ойындарының қола жүлдегері, 1999 жылғы Орталық Азия ойындарының жеңімпазы, бірнеше рет халықаралық турнирлердің жеңімпазы, level1 халықаралық деңгейдегі төреші, 6-шы дан иегері Айдын Смағұлов, Шығыс Қазақстан облысы полиция департаменті есірткі қылмысына қарсы іс-қимыл басқармасының бастығы, полиция полковнигі Дәулет Жұмаділов, облыстық денешынықтыру және спорт басқармасының басшысы Асқар Можанов, AMANAT партиясы жанындағы «Жастар Рухы» жастар қанаты облыстық филиалының төрағасы Корлан Төлеубекқызы және басқалар қатысты.
Айта кету керек, «Чемпиондық рух» жобасы еліміздің барлық аймағында «Жастар рухы» жастар қанатының ұйымдастыруымен жүзеге асырылып жатыр.
Бүгін Өскеменде «Чемпиондық рух» деген тамаша бір спорттық шара өтіп жатыр. Бұл бастаманың кейінгі буынға берер тағылымы мол. Жастарымыз спортты өміріне серік етіп, байрақты бәсекелерде еліміздің намысын абыроймен қорғап, көк туымызды биікте желбірете береді деп сенемін. – деді дзюдодан Олимпиада ойындарының қола жүлдегері Айдын Смағұлов.
Шара барысында Aqtai judo club спорт клубының дүбірлі додаларда олжа салып жүрген жүлдегерлері спорттық көрсетілімді тамашалап, аспанға алып әуе шарын ұшырды.
