Күршім ауданындағы санитарлық-гигиеналық тораптар жуық арада пайдалануға берілетін болады, деп хабарлайды F16.kz тілшісі.
Бұл туралы бүгін Өңірлік коммуникациялар қызметінде өткен брифинг барысында Күршім ауданының әкімі Мейіржан Әлбеков мәлім етті.
Айта кетейік, қазіргі уақытта аудан аумағындағы автокөлік жолдарының бойында дәл осындай екі санитарлық-гигиеналық торап бар. Оның бірі халық арасында Ащыбасы деп аталатын бұлақтың жанында орналасса, екіншісі Бұқтырма көпірінің шыға берісіне қойылған. Тораптардың бұл жерлерге орын тепкеніне біраз уақыт болса да, нысандар әлі күнге дейін жабық тұр. Осы мәселеге қатысты жолаушылар тарапынан бірталай сын айтылып жүр. Мұны аудан басшылығы да мойындап отыр.
– Әрине, аталмыш мәселеге қатысты арыз-шағым көп түсті. Осыны ескере келе алдағы уақытта бұл бағытта нақты қадамдар жасайтын боламыз. Атап айтсақ, Ащыбасындағы санитарлық-гигиеналық торапты «ОблШығысЖол» балансынан шығаруды жоспарлап отырмыз. Бұдан кейін тораптың өзін басқа жерге көшіреміз. Себебі, бұлақ басында тораптың жұмыс істеуіне қажетті электр энергиясы жоқ. Ал, көпір маңындағы торапты шілде айының алғашқы онкүндігінде пайдалануға беретін боламыз, – деп түсіндірді аудан әкімі.
