Өскемендегі 3477 әскери бөлімінің оқу полигонында жауынгерлік қарудан оқ ату бойынша жарыс өтті, деп хабарлайды F16.kz тілшісі Polisia.kz сайтына сілтеме жасап.
Турнир «Динамо» дене шынықтыру-спорт қоғамының 100 жылдығы мен Қазақстан полициясы күніне арналғанын айту керек. Жарыста тәртіп сақшылары мергендікпен ғана емес, сонымен қатар төзімділік және командалық үйлесімділікпен көзге түсті.
Әйелдер арасында Өскемен қалалық полиция басқармасы конвой қызметінің маманы Самира Солтанғазинаға тең келер қарсылас болмады. Ол 9 мм ПМ тапаншасынан ату бойынша жеке есепте бірінші орынды иеленді.
Ал ерлер арасында ең мерген полицей болып Ертіс аудандық полиция бөлімінің УПИ қызметкері Тимур Хасенов танылды. Оның нысананы дәл көздеуі мен оқ ату кезіндегі сабырлылығы өзге қатысушыларды еріксіз таңдай қақтырды.
Командалық есепте бірінші орынды Өскемен қалалық полиция басқармасының құрамасы жеңіп алса, екінші сатыға Глубокое аудандық полиция бөлімінің командасы көтерілді. Үздік үштікті Үлбі полиция бөлімінің командасы түйіндеді.
