Шығысқазақстандық полицейлер осыдан бірнеше күн бұрын жоғалған жасөспірімді іздеп тапты, деп хабарлайды F16.kz тілшісі Polisia.kz сайтына сілтеме жасап.
15 жастағы Александр Коверзин 9 маусымнан бері із-түссіз жоғалғандардың қатарында болған. Қуанышқа орай, ол аман-есен табылып, қазіргі уақытта туыстарына тапсырылды. Жасөспірімнің өмірі мен денсаулығына төніп тұрған ешқандай қауіп жоқ.
Белгілі болғандай, жасөспірім – көршілес мемлекеттің азаматы. Оның жоғалғаны туралы хабар түскен бойда, Шығыс Қазақстан облысының полицейлері жедел түрде ауқымды іздестіру амалдарын бастаған. Қала мен оның айналасын, су қоймаларының жағалауын, қаңырап бос қалған ғимараттарды, орман алқаптарын тінту жұмыстарына 500-ден астам полиция қызметкері жұмылдырылды. Іздеу жұмыстарына тәртіп сақшыларымен қатар, құтқарушылар, әскери қызметшілер, қызметтік иттері бар кинологтар мен дрондар тартылды.
Іздеу барысында азаматтардың белсенділігі де маңызды рөл атқарды. Жергілікті тұрғындардың бірі іздестіріліп жатқан балаға ұқсас жасөспірімді көргенін айтып, шамамен жүрген жерін көрсеткен. Нәтижесінде, іздеу жұмыстарының үшінші күні жасөспірімді полиция қызметкерлері Ермек Исаев пен Қуаныш Акемеев қаңырап қалған ғимараттардың бірінен тапты.
Жасөспірімнің айтуынша, ол үйінен әдейі шығып кеткен және біраз уақыт жалғыз болғысы келген. Жасөспіріммен және оның заңды өкілдерімен осындай жағдайларға жол бермес үшін профилактикалық әңгіме жүргізілді.
Осы ретте полиция мамандары ата-аналар мен қамқоршыларды жасөспірімдердің эмоционалдық жағдайына көбірек назар аударуға және олармен сенімді қарым-қатынаста болуға шақырады. Полиция іздестіру жұмыстарына атсалысқан барлық азаматқа зор алғыс білдіреді.
