Бүгін экологтар Өскемендегі ауа сапасына тексеру жүргізді, деп хабарлайды F16.kz.
Таңертең Өскеменнің көшелерін тағы түтін басып, тұрғындар әлеуметтік желіде наразылық білдіре бастады. Осыған байланысты ШҚО бойынша экология департаменті мен «Өскемен тынысы» экологиялық бюросы бірлесіп, өнеркәсіптік кәсіпорындардың санитариялық-қорғау аймақтарында жоспардан тыс мониторинг жүргізді.
Қалада кешеден бері қолайсыз метеорологиялық жағдай қалыптасқан.
Арнайы сертификатталған құрал-жабдықтармен ауа сапасы тексерілді. Нәтижесінде ауадағы зиянды заттардың рұқсат етілген шектен асу фактісі тіркелген жоқ. Тынық ауа райы мен төмен температура ластаушы заттардың жерге жақын қабаттарда жиналуына ықпал етіп, көзге тұман немесе түтін болып көрінуі мүмкін, — деп жазды ШҚО бойынша экология департаментінің баспасөз қызметі.
Десе де ауа сапасына мониторинг жүргізу жалғасып жатыр. Өнеркәсіптік нысандар штаттық режимде жұмыс істеп тұр. Төтенше жағдайлар тіркелген жоқ.
