Шығыс Қазақстан облысының Шемонаиха ауданы, Волчанка ауылында дәрігерлік амбулаторияның құрылысы жүргізіліп жатыр. Құрылыс Мемлекет басшысының тапсырмасы бойынша «Ауылдық денсаулық сақтауды жаңғырту» ұлттық жобасы аясында қолға алынған, деп хабарлайды F16.kz.
Жаңа амбулатория жергілікті тұрғындарды және жақын маңдағы елді мекендердің халқын бастапқы медициналық-санитарлық көмекпен қамтамасыз етуге мүмкіндік береді. Ғимаратта қабылдау бөлмелері, процедуралық және егу кабинеттері, күндізгі стационар және басқа да қажетті бөлмелер қарастырылған. Нысан заманауи медициналық техникамен және жабдықтармен қамтамасыз етіледі.
Жуықта Шемонаиха ауданының әкімі құрылыс басында болып қайтты. Ол атқарылып жатқан жұмыс барысымен танысып, мердігер ұйым өкілдерімен кездесті, құрылыстың сапасы мен межелі мерзіміне назар аудару қажеттігін атап өтті.
Жобаны іске асыру ауыл тұрғындарына көрсетілетін медициналық көмектің сапасын арттыруға және қолайлы жағдай жасауға бағытталған.
