Шығыс Қазақстан облыстық мәслихатының кезектен тыс XXI сессиясында 2025-2027 жылдарға арналған өңірлік бюджет қайта қаралып, қысқартылды. Бұл туралы облыстық экономика және бюджеттік жоспарлау басқармасының басшысы міндетін атқарушы Динара Жұманова айтты, деп хабарлайды F16.kz.
Үкіметтің 2025 жылғы 8 мамырдағы №314 қаулысына сәйкес, республикалық субвенция мен нысаналы трансферттер 27 миллиард теңгеге азайтылған.
Бюджет бағдарламалары әкімшілері арасында ішкі қайта есептеулер жүргізілді. Облыстық деңгейдегі бюджеттен 19,1 миллиард теңге, аудандық және қалалық деңгейдегі бюджеттерден 7,9 миллиард теңге үнемделді. 27 миллиард теңге республикалық қазынаға кері қайтарылады, — деді Динара Жұманова.
Бюджеті қысқартылғандар қатарында білім, денсаулық сақтау, дене шынықтыру және спорт, ішкі саясат, ауыл шаруашылығы, энергетика және ТҮКШ, табиғи ресурстар, жолаушылар көлігі және ветеринария басқарламалары бар.
Сондай-ақ аудан әкімдерін сайлау ұйымдастыруға арналған қаражат үнемделген.
Өскемендегі «Спорт», «Нұрлы жол» және 4-ші шағын ауданында инфрақұрылым салу жоспарланған. Аталған жоба қаражаты және Риддердегі көпбейінді аурухана құрылысының қаражаты қысқартуға ұшырады, — деді облыстық экономика және бюджеттік жоспарлау басқармасының басшысы міндетін атқарушы.
Сонымен қатар ұстаздар үшін біліктілікті арттыру курстарының, мәдениет, дін және археология салаларындағы түрлі семинарлар мен конференциялар үшін қарастырылған қаражат көлемі азаяды.
