Шығыс Қазақстан облысында құқық бұзудың алдын алуға және салауатты өмір салтын қалыптастыруға бағытталған «Ішімдіксіз ауыл» бастамасы жалғасын тауып келеді. Игі бастаманы Тарбағатай ауданының Бозша ауылы қолдады. Сөйтіп, Шығыстағы алкоголь өнімдерін сатудан бас тартқан ауылдар саны 26-ға жетті, деп хабарлайды F16.kz.
Игі істің бастаушысы – жергілікті жастар ауыл ақсақалдарына ұсыныс жасаған. Бұл шешімді тұрғындар бірауыздан қолдаған.
Бүгінде Бозшада 154 адам тұрады, 60-қа жуық түтін бар. Ауыл өзінің спортшы жастарымен және белсенді қоғамдық ұстанымымен танымал. Мұнда тұрақты түрде спорттық іс-шаралар өткізіліп тұрады, ал салауатты өмір салты — ауыл тұрғындары өмірінің маңызды бөлігі.
Мамандардың айтуынша, ішімдік сатуға шектеу қойылған елді мекендерде заң бұзу деңгейі, соның ішінде мас күйде жасалатын қылмыстар азайған. Сондай-ақ отбасылық-тұрмыстық жанжалдар, ұсақ бұзақылық фактілері төмендегені байқалады.
Айта кетейік, былтыр өңірде 21 ішімдіксіз ауыл болса, биыл олардың саны 26-ға жетті. Бұл бағыттағы жұмыс жергілікті атқарушы органдармен, қоғамдық кеңеспен бірлесе отырып, полицияның қолдауымен алдағы уақытта да жалғасады.
